"ንልያ ካሳ ካብ ሓዊ ወርቀዲኖ ሓዚልና ኣውፂናያ!"(ካልኣይ ክፋል)

ኣባል ሰርዶ ኮማንዶን ዓጃቢ ጀነራል ኑርን ነይሩ። ወራር ምስ ኣጋጠመ ምስ ሸሞንተ ርእሱ ኮይኑ እናተዋገአ ምስ ሙሉእ ዕጥቁ ናብ ሰራዊት ትግራይ ተፀምቢሩ። ኣብ ዓበይቲ ዓውደ ውግኣት እናዃሸሐን እናመርሐን ተኣምር ዘብል ቅያ ኣመዝጊቡ፤ መራሕቲ ትግራይ ካብ ምትሓዝ ኣድሒኑ። ኣብ ወፍሪ ኣሉላ ከም ነብሪ እናተወንጨፈ ፀላእቱ ከም ቆፅሉ እናርገፈ ንመራሒ ሃያ አንደኛ ክፍለጦር ኢ/ያ ጀነራል ሑሴን ዝማረኸ 'ውን ንሱ እዩ። ተቖሪፁ ኣብ ኢድ ፀላኢ ወዲቑ ኢድ ብኢድ ገጢሙ ዝወፀሉ ዘደምም ኣጋጣሚ 'ውን ኣሎ። እዚ ተኣምረኛ ጅግና ተጋዳላይ ደጀን ክንደያ ይበሃል። ታሪኽ ተኣንገዱታ።