Şeyx Dursun türbəsində bərpa və konservasiya işləri aparılır

23-26 iyul tarixlərində Ağsu şəhərində MİRAS Mədəni İrsin Öyrənilməsinə Kömək İctimai  Birliyi və YOKOKU Mədəni İrsin Konservasiyasında Gənclər Beynəlxalq Asossiasiyasının “Şeyx Dursun türbəsi: konservasiya, mədəniyyət və cəmiyyət” layihəsi çərçivəsində “Mədəni irs konservasiya materialları və metodlarının qurulması” mədəni irsin bərpası kursu keçirilir. YOKOKU Mədəni İrsin Konservasiyasında Gənclər Beynəlxalq Asossiasiyasının mədəni irsin bərpası üzrə mütəxəsisləri Romana Albini və Laura Rivaroli, eləcə də mədən irsin analitik tədqiqi üzrə mütəxəssis Andrea Makkia kursun nəzəri hissəsində mühazirə oxumuş, tarix üzrə fəlsəfə doktoru Fariz Xəlilli və Həbibə Əliyeva Şeyx Dursun türbəsinin tarixi və epiqrafikasından bəhs etmişlər. Mədəni irsin bərpası üzrə maşınlar istehsal edən İBİKS şirkətinin nümayəndələri Alfonso  Bazile and Marko İlari kursun iştirakçılarına qumatan maşınla Şeyx Dursun türbəsinin səthi üzərində təcrübə keçmişlər. Kursa Azərbaycanın müxtəlif elm və təhsil müəssisələrini təmsil edən iştirakçılarla yanaşı, Rusiyadan da (Anna Mordanova) qatılım olmuşdur.
Kursun məqsədi kimya da daxil olmaqla, nəzəri əsaslarla praktiki bacarıqlara sahib olmaq, iştirakçının daş materiallar və əsərlərin bərpasına əhəmiyyətli dərəcədə töhfə vermək, çoxtərəfli yanaşma əsasında müvafiq konservasiya işləri aparmaqdır. Problemin analitik həlli və praktiki işə əsaslanan proqram Şeyx Dursun Türbəsinin konservasiya layihəsi çərçivəsində elmi bilikləri konservasiya təcrübəsi ilə birləşdirir, iştirakçıda mədəni irsin bərpasının ehtiyaclarını ödəyə bilən peşə təhsilini inkişaf etdirir. Kurs imkan verir ki, mədəni irsin bərpası və qorunması ilə bağlı təcrübələr inkişaf etdirilsin, iş mühitində effektiv idarəetməyə nail olunsun, ənənəvi və innovativ materiallar və üsullar haqda biliklər əldə edildin, praktik mühitdə təhlükəsiz işlənilsin, daş konservasiyası ilə işləmək üçün lazım olan peşəkar və praktik bacarıqlar təmin olunsun.
Şeyx Dursun türbəsinin daş divarlarının konservasiyası zərif və mürəkkəb məsələdir. Artıq türbənin problemləri və zəruri konservasiya tədbirləri müəyyən edilib. Konservasiyanın düzgün aparılması üçün uyğun materiallar və prosedurlar seçilib. Təhlil olunan amillərin müxtəlifliyi daşın daxili xüsusiyyətləri və konservasiyanın vəziyyətini ehtiva edir. Deqradasiyanın formaları, deqradasiya mexanizmləri və ətraf mühit faktorları da nəzərə alınıb.
Şeyx Dursun türbəsi müasir Ağsu şəhəri qəbiristanlığında yerləşir. XIV əsr xəlvətilik sufi məktəbinin simvoludur. Padar Əhmədin oğlu Şeyx Dursun 1399-cu ildə vəfat etdikdən sonra onun qəbiri üzərində bu xatirə abidəsi - türbə inşa edilmişdir. Türbə səkkizguşəli olub, xəlvətilik sufi məktəbinə məxsus digər şeyxlərin qəbirləri üzərindəki türbələrlə eyniyyət təşkil edir. Şeyx Dursunun sufi xanəgahının da həmin məkanda yerləşdiyi qazıntı işləri zamanı üzə çıxan qalıqlardan anlaşılır.
Türbənin bərpa işləri Romana Albininin rəhbərliyi ilə avqust ayında da davam etdiriləcəkdir. Görülən işlər Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası Dövlət Xidmətinin razılığı və təşkilati dəstəyi ilə həyata keçirilir.