ريّض هاك يالناعي و اخذ منّي | عبدالأمير الفتلاوي - الشيخ عبدالله الدجيلي

كُتِبتْ وَمَازَالَتْ ١٤٤٥ هـ
ليلة ١٢ محرم ١٤٤٥ هـ


ريّض هاك يالناعي و اخذ منّي
عتب للـ بالغري عاني او متعنّي

عاني ومعتني خذ معصب و مرسول
اِخذ مسره ابطريج العيب بيه انزول
لاچن گول گلّي من تصـل شتگول
حيدر والدي لو ناشدك عنّي

يگلها الخاطرچ لگطع ادروب اخطار
وأصب الدمع من دم عالوجن شطّار
اطب وادي النجف وأنده يحامي الجار
معصب زينب و كتب العتب ذنّي

عنّك معصبي و كتب العتب ليكون
لاچن كون تنده وين ليث الكون
شبل احسين گلّه اطعين هذا ايهون
والعرّيس جاسم بيش متحنّي

لا والله و بعد تثني و تحوربله
تخبره ابحال سبع الگنطره شبله
و عبدالله الطفل مفطوم بالنبله
گلّه و بعد شو شتريد سايلني

گلّه امن المدينه و تحضر ابأيوان
مع بعد المسافه و تدفن لـ سلمان
ليش احسين خلّيته يعالي الشان
عنّك يوم واحد خيّـبت ظـنّـي

عنّك يوم واحد چي يظل مطروح
عنّك يوم واحد چي يساره انروح
انوح و ناوحنّي الناوحن بالدوح
أحن والبل تحن اللوعتي و حنّي

أحن أيتام عندي و حرم والي تريد
هاذه انصاف واحنه أشراف نگطع بيد
فوگ امصابنه السجّاد غِل و گيد
فوگ المحنة الـويّاي مـحّـنّـي


الشاعر المرحوم: عبدالأمير الفتلاوي
المصدر: سلوة الذاكرين في النبي وآله الطاهرين
بصوت الخطيب: الشيخ عبدالله الدجيلي

#كتبت_ومازالت
#حسينية_ابوطالب
حساب الحسينية على منصة الإنستقرام
@hussainyat.abutaleb
Instagram: hussainyat.abutaleb