عبدالله علوش وجهة نظر .. مع الكلمات .. أجمل شعر وأجمل نصائح وأجمل حكم

عبدالله علوش - وجة نظر

على حسـب ما مـرني ومن تـجارب الاولـين
وجهة نظر و يـجـوز فيهـا الاتفاق وَ الانـقـسـام

اترك مسافه كافيه بينـك وَ بـيـن الآخريـن
بعض البشـر ودك حـدود المعرفه معهم سلام

اصمت وَ لا تحرص على كثر الكلام الصمـت زين
اللّي سكوته ساتره يمكـن يعـريه الكلام

وَ إذا تكلمت احذر تكون أكثر المتكلمين
السالـفـه لا طولـت يضعـف معاها الاهـتمام

اضحك و لا تضحك برفع الصوت رفع الصوت شين
من الادب والذوق عند الضحك ضحكٍ بإبتسـام

وَ احلم وَ لا تغـضب وَ لا تعجل وَ لا تـشـري بدين
وَ شـاور ولو رايك معك لا شـرت عداك الملام

وليا شريت بدين لا تبطي على المتجمليـن
كلٍ حلاله غاليٍ عنـده لو انـّه ما يـسام

وَ ترى التغافل فيه لذه وانـشـد المتغافلين
وان جات كلمه توجـع اطلقها مـع سـرب الحمام

وارضى ليا جاك الرضى لو العـذر ما هـو سميـن
وَ تـرى التسامح ميـزة الساده رفيعين المقام

وَصادق واذا صادقـت ما جربت ما صادقـت لـين
اما يطول بك السهر والا يطيب لك المنام

واصدق مع نفسك وتلقى نفسك من الصادقين
والنفس خيل ابلـيس لا تعطيه نفسـك وَ اللجام

وليا نصحـت انصح خفى لا تفضحه فالحاضرين
ترى الرجال يقودها لين الحكي قود الخطام

ولا التواضع في حضور العالم المتكبرين
تعامل بنـفـس الطريـقـه معهم وَ نفس النظام

واخلاقك وَ تواضعك عامل بها المتواضعين
ونصـف الادب مجامله جامل و لا تجامل لئام

وَ العمر ماهو فرصةٍ وحده وَ لاهـو بفرصتين
مع كل مطلع شمس لك فرصه وَ خطوه للأمـام

هذا وَ لازلنـا تعلـمنا الليالي وَ الـسـنين
وَ العلـم أخير من الجهل وَ النور جلاي الظلام