Budgeted Trip to Panna Tiger Reserve | How to book Safari Cost & Timings 4K-Hindi Discover Wild Paws

How to book Panna - How to Book Jungle Safari - Bandhavga...
Best Zones in Panna - पन्ना टाइगर रिज़र्व में कौन से जोन में...
Homestay in Panna - Home Stay in Panna Tiger Reserve | Be...

Panna Tiger Reserve apni heeron ki khadanon aur mandiron ke liye jaana jaata hai. Madhya Pradesh ke Panna aur Chattarpur district mein bassa ye park, Khajuraho se sirf 26 kilo meter ki duuri pe hai. Iss park of Tiger Reserve ka darja 1994 mein diya gaya tha aur ab lagbhag 20 saal baad, yahan 80 se upar baagh rehte hain.
Iss video ki madad se aap Panna ki ek trip kam budget mein plan kar paenge. Ek Ek karke trip ke har pehlu ko dekhte hain.
Do raatein aur teen din ki ek trip lagbhag 8 se 20 hazaar per person ki padegi. Aur ye amount aapke group size, hotel ki choice, safari ki choice aur travel ki choice pe nirbhar karti hai.
Sabse pehle toh ye tayy karna hoga ki aap Panna pahonchna kaise chahte hain? Central India aur North Central India se aane wale log, jaise ki Khajuraho, Gwalior aur Jhansi se aane wale apni gaadi se aa sakte hain. Ye Khajuraho se lagbhag 26 km, Gwalior se lagbhag 286 km aur Jhansi se lagbhag 183 km ki duuri pe hai. Aur toll taxes wagera mila ke ek round trip aapko lagbhag 700-1000 ki padegi.
Dusra option hai ki Seedha Khajuraho junction ya Satna station ki train le li jaye. Khajuraho station lagbhag 40 km duur hai aur wahan se asaani se bus ya cab mil jaegi. EK baat ka dhyaan rakhen, ki Khajuraho ke train options thode kam hain kyunki ye thoda remote location padhti hai. Dusri orr Satna lagbhag 90 km duur hai aur yahan ke superfast train ke options thode zyada hain. Satna se Panna ki ek taraf ki cab lagbhag 1500-2000 ki padegi. Cab lene ka sabse asaan tareeka hai station se bahar aaiye, thoda mol-bhaav kijiye aur cab book kar lijiye. Pehle se book karne se mehengi padegi.
Desh ke South ke rajyon se aane wale ya fir New Delhi Punjab Haryana se aane walon ke liye better option hai ki wo Khajuraho ki flight le len aur wahan se seedha Panna ki cab kar len. Ab kyunki Khajuraho ke flight options bhi kam hain, toh aap Allahbad ki flight lekar wahan se bhi cab kar sakte hain.


Panna Pahonchne ke baad dusri cheez jo aapko karni hai wo hai rehne ka intezaam. Iske bhi kayi saare options hain. Bass ye dhyaan rakhiye ki aapka jo hotel ya homestay ho, wo safari gate ke paas ho. Ek baar apne hotel mein call karke baat bhi kar lijiye ki wo jeep ko hotel bula sakte hain ya nahi. Madla gate pe bana MPT resort ek bohot acha option hai jisko aap official website se book kar sakte hain.
Ken nadi ke pass bohot se homestay aur resort ke options bhi hain. Hum yahan pe bane ek homestay mein ruke the aur uska poora tour humne video mein daala hai. Link neeche description mein dala hai.
Aap khud video dekh ke tayy kar sakte hain ki aapke liye kya theek rahega.
Accomodation ke baad aati hai, Wildlife experience ki teesri aur sabse zaruri cheez-  Safari booking. Ye ek aisi cheez hai jisme kayi logon ko poori information nahi hai aur iss chakkar mein wo agents ko kaafi paise de jaate hain. Aap Panna mein apni safari khud book kar sakte hain. Aap chahe toh ek seat book karen, ya fir poori jeep.
Ek seat ka average price lagbhag 1000-1100 rupay aata hai. Neeche description mein humne video ka link daala hai jisse aap Panna mein wildlife safari book kar sakte hain. Jaiye dekhiye aur khud book kariye.
Panna ki ek aur khaas baat hai yahan ki night safari jo ki yahan ke buffer zones mein hoti hai. Shaam ko 7:30 se 10 baje tak aap Buffer zones ghum sakte hain aur kismat mein hua, toh baagh ke darshan bhi ho sakte hain.
Night safari ka price hai lagbhag 5100 rupay aur iske liye aap chahe akele hon ya 6 log, aapko poori jeep hi book karni hoti hai. Ab jab hum jungle safari ke saare pehlu sun chuke hain, toh dekhte hain ki Panna ka budgeted wildlife trip kaise plan kar sakte hain.

Desh ke jis bhi hisse se aap aa rahe hain, aapko lagbhag dopahar ke 12 baje tak Panna pahonch jana chahiye. Zyadatar hotel ka check-in time 1 baje ka hota hai par baat karke dekhen toh early checkin mil jaata hai.
Toh jaldi se Check in kar khana kha ke apni pehli safari ke liye ready ho jaye.
Jo safari aapko book karni hai, wo hai pehli shaam ki aur agli subah ki. Iss tarah, aap hotel ka kharcha bhi bacha lenge aur subah shaam dono safari ka mazza le lenge. Agli subah jab aap 11:30 baje wapas aaenge, toh aapko agli safari ke liye kaafi samay mil jaega. Aap chahen toh wapas apne sheher nikal sakte hain ya fir ek evening aur morning safari aur kar sakte hain.
Aap chahen, toh inn do dino mein aap ek night safari bhi kar sakte hain. Par night safari thodi si mehengi hoti hai toh isme apna budget consider kar len.
Toh asha hai ki iss video se aapki kuch madad hui hogi. Aur agar aisa hai, toh thodi madad humari bhi kar dijiye. Video ko like kar dijiye aur channel ko subscribe kar dijiye.
Jald hi aise aur videos ke saath wapas aaenge. Tab tak ke liye apna khayal rakhen.