هموم عراقيه || فيديو " نادر " للشاعر الراحل عزيز السماوي 1980 || من ضمن ديوان النهر الاعمى

هموم عراقية

إلَك جبت الشمس ، والنار أقواس

إلك صلّت سيوف إمن الفرح تنباس

إلك واهس يعدل الفكر بالراس

جرحني إعله طولي . فرح . لا باس

ورده إتطكَ همومي ، أو ترفع الراس

ولو چفّك حرير ، إو خاف ينجاس

ولك جيس الورد ، يتلون الياس

أهيّس جرحي بچفوفك . جمر ينباس

خيط الدم يروح إبعيد

يمتد إبطول الفرات إبعيد

يلمض براسي غضب ، ويعيد

هاله إچفوفنه ، إتعاند ولا تنداس

او صهيل اعيونچ ، ايورد حلم ينجاس

عيب الناس تمشي ، إبذلة الناس

إلك خضره الأغاني ، اتفيض أنهار

وإلك سر الغميج اليشبك أسرار

رجف طولي رمح ، يتنطرك ثار

أعبدك ، ريح من تلعب لعب بالنار

لو دار الزمن ، بالموت إلك نندار

فاض الدم

بيديك

إجروحي أفكار

مدري الزمان اختلف . مدري اختلفت الناس

وديّت النذر شمسين للعباس

كَمره : الصوت من يصعد فرح بالراس

يدكَ هذا الضمير ، إبذاك

إو يخلي الدم ، يشدّ الناس للناس .

الحزن نجمه تطيح إبطارف العين

بجت أمي عليك ، بصدري مرتين

ضحك يبج بيديّ أو وَجّت اسنين

هاله إو كَمرها انداس بالطين

أشوفك بالحلم ، تضحك بساتين

ذبحني السر عليك ، او دمي صوبين

مصلوب اعله بابك . منهو أنتَ ، منين ؟

من تلمض تفكَ . تعركَ چفوف الناس

رجف بيدي الحنين إلشوفتك كاس

ولك فرّ الحنين إو وگع الوهواس

إو خلّي الدم ، يشدّ الناس للناس

أحط دمي إعله جفك ، يعتلكَ موال

روحي الخيل من تصهل ، سيوف طوال

إعيوني من الفرح ، طارن حمام أشكال

ويّاك يمشي النبض . مشعل بجف خيّال

دمي إبدفترك ، وردة إو رسوم أطفال

الشاعر لو بجه دم إو غضب . جتّال

طوله يصيح

يصعد أغنية إو ينزل

كَمر بالريح

يصلّي إعله الجرح . تضوي الخيول

إتصيح

إو يصلي النوب . عكس الريح

لا . ما أطيح

يفز غبشه الجرح . كلّش يريد إيصيح

من تلمض تفكَ

تدمع إجفوف الناس

أويلي إيرف بيديَ ، اشجم نهر حسّاس

إو بچه گبل المشي

عَطّب بگلبه الحچي

إو غص النبض بالناس

يا مشعل يجيب الناس للناس

حزيران 1980
_____::______

الشاعر : الكبير عزيز السماوي

ديوان  :  النهر الاعمى