جديد الشاعر مبارك الحجيلان - ولا يغش الرجال الا هقاويها

صبرك وحلمك على الدنيا ومن فيها
وتقبّل الوضع ،،،، لو تكثر بلاويها
•
مره اتصافيك / كن الحظ صافي لك
ومره اتجافيك ،،،، ماتقدر تجاريها
•
ومرات ظلما ولابه حل ،،، قدامك
ولاتصبح الصبح إلا النور ،،، كاسيها
•
واسمع : تبي تنصدم لاخابت ظنونك
وارتاح يوم الحقيقه بان ،،، خافيها
•
لاتحط الآمال / قبل الموقف البيّن
ولاتنخدع بالكبار ،،، وكبر اساميها
•
ومقيوله من عمر سامعها وحافظها
( ولايغش الرجال ،،، الا هقاويها )


عليك بالصامل ،، الفزاع ،،، ماغيره
اللي ليا كبرت الدعوه ،،، يوطيها
•
ماهوب من ربع : تفتح باب للعالم !!
من ربع : لاقال ابنهيها ،، بينهيها
•
يعز ربعه ،، بني عمه ،، وصدقانه
ويديه للضايق / الحايج / مبديها
•
تطلبّه وتحس بأنّه راعي الحاجه
يصون عزتك ،، باقواله ويحميها
•
يمناه في حزة الصملات ماترجف
اتخامس الصعب ماتحسب تواليها
•
لاغاب كلن بيذكر ،،، فعله وطيبه
واليا حضر ،، غنت الفرحه لياليها



انشهد الطيب فعل وموقفن واضح
خلك مع اللي افعوله منت محصيها

شخصٍ يعاملك في طيبه وباخلاقه
حافظ على رفقته ،،، واياك تمحيها

وقفّ معه واصله واخلص له الخوه
ولاجات دعوه بها اسمه ،،، لاتخليها

وشخص يتجاهلك وانت بصحبته وافي
عاملّه بالمثل ،،، لاتكشف خوافيها

من زم روحه على العالم يبي يندم
بكره يحوّل براسه ،،، من عواليها

جاهد وأمورك بعون الله ،،، مقضيّه
وإرفع يدينك اليا ضاقت / نواحيها

حزنك وفرحك تراها دبرة الخالق
والنفس لو تنحرم / ربك بيعطيها