Gangamma Jathara 2023 | ఇవేం బూతులు నాయనా | విడ్డూరం కాదు ఇక్కడి ఆచారం అది

#gangammajathara2023

తిరుపతి గంగమ్మ జాతర రాయలసీమ ముఖ్యంగా చిత్తూరు పరిసర ప్రాంతాల ప్రజల ఆచార వ్యవహారాలు, వారి జీవన విధానాలను ప్రతిబింబిస్తుంది. శ్రీ తిరుపతి తాతయ్యగుంట గంగమ్మకు జాతరకు తమిళనాడులోని పలు ప్రాంతాల నుంచి భక్తులు తరలివస్తారు. ఎనిమిది రోజులపాటు అత్యంత వైభవంగా ఈ జాతరలో భక్తులు రోజుకో వేషంలో అమ్మవారిని దర్శించుకోవడం దీని ప్రత్యేకత. బైరాగి వేషంతో ప్రారంభమయ్యే వేషాల కోలాహలం గ్రామీణ సంస్కృతిని ప్రతిబింబించేలా ఉంటాయి. ప్రతి వేషంలోనూ ఎంతో ప్రత్యేకత, ఆధ్యాత్మిక అంతర్యం దాగివుంది. పాలేగాడిని గుర్తించడానికి అమ్మవారు ఆయా రోజుల్లో వేసే వేషాలను భక్తులు అనుసరించడం దీంతో అమ్మవారు సంతృప్తి చెంది వారి కోరికలు తీర్చుతుందన్నది ప్రగాఢ విశ్వాసం.


జాతరలో రెండో రోజు బైరాగి వేషం వేసి ఒంటిపై నాముకొమ్ము పూసుకుని, వేపమండలు చేతబట్టి ఒకరినొకరు బూతులు తిట్టుకుంటూ ఆలయానికి చేరుకొని అమ్మవారిని దర్శించుకుంటారు. మూడోరోజు బండ వేషం, నాలుగో రోజు తోటి వేషం వేసుకుంటారు. తోటి వేషంలో భాగంగా ఒంటిపై మసి బొగ్గు పూసుకుని, తెల్లని నామం, కనుబొమ్మలపైన చుక్కలు పెట్టుకోవడం సంప్రదాయం. చిన్నపిల్లలు మీసాలను ధరిస్తారు. తలపై వేపాకు మండలు, పాతపొరక చేతబట్టి వీధుల్లో సంచరిస్తూ వేషాలమ్మ తల్లి ఆలయానికి చేరుకుంటారు. అక్కడ నుంచి తాతయ్యగుంట గంగమ్మను దర్శించుకుంటారు. ఐదో రోజు నగరంలోని కైకాల కులస్థులు వంశపారంపర్యంగా దొరవేషాన్ని ధరిస్తారు. ఆరో రోజున ధరించే మాతంగి వేషాలు అత్యంత ప్రధానమైనమి. పురుషులు సైతం మహిళల్లా అలంకరించుకుని అమ్మవారి దర్శనం చేసుకుంటారు.

మరోవైపు, కైకాల కులస్థులు సున్నపు కుండల వేషాన్ని ధరించి గంగమ్మకు ప్రతిరూపంగా నగరంలోని ప్రతివీధిలో సంచరిస్తూ భక్తుల నుంచి హారతులందుకుంటారు. ఇక చివరి రోజు గంగమ్మ విశ్వరూప దర్శనం జరుగుతుంది. అనంతరం పేరంటాళ్ల వేషం ధరించిన వంశస్థుడు అమ్మవారి చెంప నరకడంతో జాతర ముగుస్తుంది. అమ్మవారి విశ్వరూప నిర్మాణానికి ఉపయోగించిన బంకమట్టిని స్వీకరించడానికి భక్తులు పోటీపడతారు. ఈ మట్టిని స్వీకరిస్తే దీర్ఘకాలిక రోగాలు, గృహబాధలు, దేహబాధలు, భయం నశిస్తాయని విశ్వాసం. గంగమ్మను దర్శించుకునే ప్రతి ఒక్కరిలోనూ అచంచలమైన విశ్వాసం, తమ జీవితాల్లో ఆమె ప్రభావం ఉంటుందని బలంగా నమ్ముతారు.