Гүлсүн Мамашева "Айбыгып жүрөм"

Сөзү: Барыктабас Абакировдуку
Обону: Абидин Темировдуку
Көрүнө калса карааның,
Көгүлтүр оттой жанамын.
Шылтоолоп болбос иш үчүн,
Шынаарлап жакын барамын.
Ийменип бирок сүйлөбөй,
Ичимден сызып каламын.

Мезгилдер учат зымырап,
Мендеги ойлор жыйылат.
Капыстан артта келатсаң,
Кадамым калат кыбырап.
Бир паска бирге басканда,
Бүткөн бой кетет чымырап.

Махабат көлүн жай кылып,
Маанайым пасмын кайгырып.
Ойнойбуз түштө булакта,
Ойгонсом калам айрылып,
Кыздарга кыйын иш экен,
Айталбай жүрөм айбыгып.

Жаштарга кыйын иш экен,
Айталбай жүрөм айбыгып.

• #nonprofits_activism
• #
• #