يا منير عمر لي من التتن معمار قصيدة الشاعر بندر بن سرور بصوته

يا منير عمرلي من التتن معمار
يبري الغليل اللي على القلب جالي
ولا رفعت الصوت وابديت ما صار
من شان تدري ويش ولا بحالي
ما اكفاك من سجتي بعض الامرار
انهج جنوب وحاجتي بالشمالي
اركض مع الدنيا كما ركض دوار
ياما كسب زنذي وياما غدالي
الله على اللي عايروها بالأمتار
اطراز بنج شغلت بالعدالي
زادوا هواها واطعموها من النار
حتى الأمبير المنجضع عد صالي
نشت سما ما جربوها مع القار
طارت مطير الطير ربع الكحالي
تلفي على اللي في طرف نجد سنجار
يشدي جبل سنجار بين الجبالي
في أطراف بيته للمواجيب شنكار
معلاق كبشن عند راعيه غالي
ثم قل لبو بندر ترا الوقت بوار
يفطن تراني ما انفعه لو شكالي
ان زان وقته صار بالسلك يندار
وأن شان قص مروبعات الحبالي
قوم عتيبه شيوخهم مالها امرار
انسور حوم يتبعن النوالي
والله يا لولا الخوف من بعض الاشرار
لعد شين شفته اول وتالي
كم واحدن بين العماهيج هذار
مغترته نفسه بكبر  الظلالي
يبلس على ربعه ويقنع بالاسوار
ويعد نفسه من حساب الرجالي
كفه بخيل وقلبه انجس من الفار
اسود طرف وادغم من السرمدالي
هذاك بعده خير ما كنت ابختار
اجزاه بالصدات وابعد مجالي
ابعد مجال الرجل عن كل هذار
واصبر على الصكات والعمر بالي
واليا وطني غبر الأيام بزوار
غيري جماعه ما وطني الحالي
شلت الوزا واشتلت لي منه قنطار
واليا عدلته شرق للغرب مالي
عبرن على الدنيا من العسر ليسار
ما ضنتي فيها حرام وحلالي
حرام للفنجال سوقه اليا فار
الا على اللي يرخصون الريالي
وانا الذي ما اقول في نجد شعار
واذا به شعار محدن حكالي